Pas-E-Tauba Hadis-E-Mutrib-O-Paimana Kahte Hain

Munshi Naubat Rai Nazar Lakhnavi

pas-e-tauba hadis-e-mutrib-o-paimana kahte hain

ye ik bhula hua par aaj ham afsana kahte hain

koi khun-e-tamanna ho jhalak aata hai aankhon men

isi ko ittihad-e-bada-o-paimana kahte hain

tabahi dil ki dekhi hai jo ham ne apni aankhon se

ho ab kaisi hi basti ham use virana kahte hain

fana hone men soz-e-shama ki minnat-kashi kaisi

jale jo aag men apni use parvana kahte hain

jafa par sabr sikha hai vafa par jaan jaati hai

yahi hai aur kis ko tohmat-e-mardana kahte hain

tumhari zulf-e-pechan men raha kyun-kar dil-e-vahshi

tuda le jaae jo zanjir use divana kahte hain

maaz-allah tera husn teri bazm-e-ishrat men

ye vo mahfil hai jis men shama ko parvana kahte hain

yahan to jaan tak de di ‘nazar’ padash-e-ulfat men

magar bedad-gar baaqi abhi jurmana kahte hain