Pas-e-Adab Mujhe Unhen Sharm-O-Haya Na Ho

Bedam Shah Warsi

pas-e-adab mujhe unhen sharm-o-haya na ho

nazzara-gah men asar-e-ma-siva na ho

maana miri qubul nahin hai dua na ho

itna hi ho ki us pe asar ghair ka na ho

kyuun kar kahun ki paas unhen ghair ka na ho

jo ghusse men bhi kahte hain tera bura na ho

us parde men to kitne gareban chaak hain

vo be-hijab hon to khuda jaane kya na ho

takiye men kya rakha hai khat-e-ghair ki tarah

dekhun to main navishta-e-qismat mira na ho

mil kar gale vo karte hain khanjar ki tarah kaat

is par bhi kah raha huun ki mujh se juda na ho

muusa ka haal dekh ke dil kanpne laga

ab to dua hai un se mira samna na ho

vo baar baar mera lipatna shab-e-visal

un ka jhijak ke kahna koi dekhta na ho

‘bedam’ ki zindagi hai isi chhed-chhad men

tark-e-vafa ki tarh se tark-e-jafa na ho