Gulzar
os padi thi raat bahut aur kohra tha garmaish par
saili si khamoshi men avaz suni farmaish par
fasle hain bhi aur nahin bhi naapa taula kuchh bhi nahin
log ba-zid rahte hain phir bhi rishton ki paimaish par
munh moda aur dekha kitni duur khade the ham donon
aap lade the ham se bas ik karvat ki gunjaish par
kaghaz ka ik chand laga kar raat andheri khidki par
dil men kitne khush the apni furqat ki araish par
dil ka hujra kitni baar ujda bhi aur basaya bhi
saari umr kahan thahra hai koi ek rihaish par
dhuup aur chhanv baant ke tum ne angan men divar chuni
kya itna asan hai zinda rahna is asaish par
shayad tiin nujumi meri maut pe aa kar pahunchenge
aisa hi ik baar hua tha iisa ki paidaish par
Leave a Reply