Sheikh Ibrahim Zauq
nigah ka vaar tha dil par phadakne jaan lagi
chali thi barchhi kisi par kisi ke aan lagi
tira zaban se milana zaban jo yaad aaya
na haae haae men taalu se phir zaban lagi
kisi ke dil ka suno haal dil laga kar tum
jo hove dil ko tumhare bhi mehrban lagi
to vo hai mah-jabin misl-e-dida-e-anjum
rahe hai teri taraf chashm-e-yak-jahan lagi
khuda kare kahe tujh se ye kuchh khuda-lagti
ki zulf ai but-e-bad-kesh tere kaan lagi
udaai hirs ne aa kar jahan men sab ki khaak
nahin hai kis ko hava zer-e-asman lagi
kisi ki kavish-e-mizhgan se aaj saari raat
nahin palak se palak meri ek aan lagi
tabah bahr-e-jahan men thi apni kashti-e-umr
so tut-phut ke baare kinare aan lagi
tumhare haath se siine men dil se ta-ba-jigar
sinan o khanjar o paikan ki hai dukan lagi
khadang-e-yar mire dil se kis tarah nikle
ki us ke saath hai ai ‘zauq’ meri jaan lagi
Leave a Reply