Nigah-E-Naz Ne Parde Uthae Hain Kya Kya

Firaq Gorakhpuri

nigah-e-naz ne parde uthae hain kya kya

hijab ahl-e-mohabbat ko aae hain kya kya

jahan men thi bas ik afvah tere jalvon ki

charagh-e-dair-o-haram jhilmilae hain kya kya

do-char barq-e-tajalli se rahne valon ne

fareb narm-nigahi ke khaae hain kya kya

dilon pe karte hue aaj aati jaati chot

tiri nigah ne pahlu bachae hain kya kya

nisar nargis-e-mai-gun ki aaj paimane

labon tak aae hue thartharae hain kya kya

vo ik zara si jhalak barq-e-kam-nigahi ki

jigar ke zakhm-e-nihan muskurae hain kya kya

charagh-e-tur jale aina-dar-aina

hijab barq-e-ada ne uthae hain kya kya

ba-qadr-e-zauq-e-nazar did-e-husn kya ho magar

nigah-e-shauq men jalve samae hain kya kya

kahin charagh kahin gul kahin dil-e-barbad

khiram-e-naz ne fitne uthae hain kya kya

taghaful aur badha us ghazal-e-raana ka

fusun-e-gham ne bhi jaadu jagae hain kya kya

hazar fitna-e-bedar khvab-e-rangin men

chaman men ghuncha-e-gul-rang laae hain kya kya

tire khulus-e-nihan ka to aah kya kahna

suluk uchatte bhi dil men samae hain kya kya

nazar bacha ke tire ishva-ha-e-pinhan ne

dilon men dard-e-mohabbat uthae hain kya kya

payam-e-husn payam-e-junun payam-e-fana

tiri nigah ne fasane sunae hain kya kya

tamam husn ke jalve tamam mahrumi

bharam nigah ne apne ganvae hain kya kya

‘firaq’ rah-e-vafa men subuk-ravi teri

bade-badon ke qadam dagmagae hain kya kya