Nazar Kisi Ko Wo Mu-E-Kamar Nahin Aata

Poet

nazar kisi ko vo mu-e-kamar nahin aata

ba-rang-e-tar-e-nazar hai nazar nahin aata

zamana-e-gham-e-furqat basar nahin aata

ajal bhi aati nahin yaar agar nahin aata

hamesha huun bhi main rota ba-rang-e-shabnam-o-abr

gali se kaun tire chashm-tar nahin aata

ye hai nigah se dar-parda tegh-zan qatil

ki iltiyam ye zakhm-e-jigar nahin aata

gham-e-firaq men mar mar ke roz jiita huun

vo kaun shab hai jo munh tak jigar nahin aata

faqat na naam se chalta hai kaam duniya men

ki zer-e-sikka kabhi gul ka zar nahin aata

vo lad ke milte nahin mil ke ham pakadte nahin

vo sulh karte nahin ham ko shar nahin aata

firaq-e-zulf men roz uth ke shab ko rota huun

ki sar se gesu-e-shab ta-kamar nahin aata

vo shah-e-husn khafa hoe ‘arsh’ kahta hai

gira jo paanv par kyuun us ka sar nahin aata