Faiz Ahmad Faiz
nasib azmane ke din aa rahe hain
qarib un ke aane ke din aa rahe hain
jo dil se kaha hai jo dil se suna hai
sab un ko sunane ke din aa rahe hain
abhi se dil o jaan sar-e-rah rakh do
ki lutne lutane ke din aa rahe hain
tapakne lagi un nigahon se masti
nigahen churane ke din aa rahe hain
saba phir hamen puchhti phir rahi hai
chaman ko sajane ke din aa rahe hain
chalo ‘faiz’ phir se kahin dil lagaen
suna hai thikane ke din aa rahe hain
Leave a Reply