A G Josh
na sochna ki zamane se dar gae ham bhi
tiri talash men ghairon ke ghar gae ham bhi
chura liin ham se bhi us khud-parast ne ankhen
dil-e-habib se akhir agar gae ham bhi
pasija dil na kisi ka hamare ashkon se
har astan pe liye chashm-e-tar gae ham bhi
jo dekha kaliyon ko tujh par nisar hote hue
to rang ban ke faza men bikhar gae ham bhi
jab us ki zauq-e-nazar ka hua bahut charcha
vufur-e-shauq se ek din sanvar gae ham bhi
bahut se ishq ki rahon men pul-sirat aae
tumhara naam liya aur guzar gae ham bhi
muhal tha ki ham ai ‘josh’ zinda rah sakte
firaq-e-yar men ik roz mar gae ham bhi
Leave a Reply