Saleem Kausar
na is tarah koi aaya hai aur na aata hai
magar vo hai ki musalsal diye jalata hai
kabhi safar kabhi rakht-e-safar ganvata hai
phir is ke baad koi rasta banata hai
ye log ishq men sachche nahin hain varna hijr
na ibtida na kahin intiha men aata hai
ye kaun hai jo dikhai nahin diya ab tak
aur ek umr se apni taraf bulata hai
vo kaun tha main jise raste men chhod aaya
ye kaun hai jo mire saath saath aata hai
vahi tasalsul-e-auqat tod dega ki jo
dar-e-ufuq pe shab-o-roz ko milata hai
jo asman se raten utarta hai ‘salim’
vahi zamin se kabhi aftab uthata hai
Leave a Reply