Musafir

Asrarul Haq Majaz

musafir yunhi giit gaae chala ja

sar-e-rahguzar kuchh sunae chala ja

tiri zindagi soz-o-saz-e-mohabbat

hansae chala ja rulae chala ja

tire zamzame hain khunuk bhi tapan bhi

lagae chala ja bujhae chala ja

koi laakh roke koi laakh toke

qadam apne aage badhae chala ja

hasin bhi tujhe raste men milenge

nazar mat mila muskurae chala ja

mohabbat ke naqshe tamanna ke khake

banae chala ja mitae chala ja

qadamat haden khinchti hi rahegi

qadamat ki buniyad dhaae chala ja

qasam shauq ki fitrat-e-muztarib ki

yunhi nit-nai dhun men gaae chala ja

jo parcham utha hi liya sar-kashi kaa!

use asman tak udaae chala ja