Poet
mujh ko masnad pe qalamdan bakhsha
sher-e-qalin ko niyastan bakhsha
pir-e-kanan ko diya dagh-e-firaq
ek zan ko mah-e-kanan bakhsha
maraz-e-ishq men maut aati hai
tu ne har dard ko darman bakhsha
qabil-e-did hai husn-e-hikmat
huur ko rauza-e-rizvan bakhsha
qatra bhi vusat-e-rahmat se hai bahr
chashm ko nuuh ka tufan bakhsha
dil-e-nalan ko diye dagh-e-firaq
ek bulbul ko gulistan bakhsha
dil-e-be-rahm diya zalim ko
jis tarah tiir ko paikan bakhsha
gul ko pur-zar jo gareban bakhsha
khaar ko dasht ka daman bakhsha
rahm aaya jo gunahgaron par
gunah-e-gabr-o-musalman bakhsha
aa gaya kuchh jo karimi ka khayal
huur ko mulk-e-sulaiman bakhsha
teri tadbir hai ain-e-taqdir
maut ko alam-e-imkan bakhsha
surkh-ru ahl-e-karam ko rakkha
bahr ko panja-e-marjan bakhsha
lab ki ja bosa-e-rukhsar diya
evaz-e-laal badakhshan bakhsha
mushaf-e-rukh ka jo dekha koi sher
ruh-e-‘hafiz’ ko bhi quran bakhsha
us se huun talib-e-iman ai ‘arsh’
jis ne kafir ko bhi iman bakhsha
Leave a Reply