Mujhe Talash Karo

shajar se tuut ke jab main gira kahan pe gira

mujhe talash karo

jin andhiyon ne miri sar-zamin udhedi thi

vo aaj maulid-e-isa men gard udati hain

jo ho sake to unhi se mira pata puchho

mujhe talash karo

chali jo mashriq-o-maghrib se tund-o-tez hava

mire shajar ne mujhe pyaar se samet liya

mujhe lapet liya apni kitni bahon men

ye be-lihaz anasir magar ba-zid hi rahe

main barg-e-sabz gira barg-e-zard ki manind

usi sulagti hui raakh si patavar men

jo bichh rahi hai ufuq se ufuq ke paar talak

mujhe talash karo

shajar se kat ke zaban kat gai na ho meri

main chikhta huun magar harf-e-na-shunida huun

hayat-e-taza hai meri shajar se mera milap

ki bas vahi miri balidgi ka mambaa hai

jo regzar men chhitnar dekhne hain tumhen

mujhe talash karo

falak ke raaz to khulte rahenge ham-nafaso

mire vajud ka bhi ab to raaz faash karo

mujhe talash karo