Mujhe Gale Se Laga Lo Bahut Udas Hun Main

Sahir Ludhianvi

mujhe gale se laga lo bahut udaas huun main

gham-e-jahan se chhuda lo bahut udaas huun main

ye intizar ka dukh ab saha nahin jaata

tadap rahi hai mohabbat raha nahin jaata

tum apne paas bala lo bahut udaas huun main

bhatak chuki huun bahut zindagi ki rahon men

mujhe ab aa ke chhupa lo tum apni banhon men

mira saval na taalo bahut udaas huun main

har ik saans men milne ki pyaas palti hai

sulag raha hai badan aur ruuh jalti hai

bacha sako to bacha lo bahut udaas huun main