Mujh Mast Ko Mai Ki Bu Bahut Hai

Ameer Minai

mujh mast ko mai ki bu bahut hai

divane ko ek hu bahut hai

moti ki tarah jo ho khuda-dad

thodi si bhi aabru bahut hai

jaate hain jo sabr-o-hosh jaaen

mujh ko ai dard tu bahut hai

manind-e-kalim badh na ai dil

ye dard ki guftugu bahut hai

be-kaif ho mai to khum ke khum kya

achchhi ho to ik subu bahut hai

kya vasl ki shab men mushkilen hain

fursat kam aarzu bahut hai

manzur hai khun-e-dil jo ai yaas

apne liye aarzu bahut hai

ai nashtar-e-gham ho laakh tan-e-khushk

tere dam ko lahu bahut hai

chhede vo mizha to kyuun main rouun

ankhon men khalish ko mu bahut hai

ghunche ki tarah chaman men saaqi

apna hi mujhe subu bahut hai

kya gham hai ‘amir’ agar nahin maal

is vaqt men aabru bahut hai