Saleem Kausar
milna na milna ek bahana hai aur bas
tum sach ho baaqi jo hai fasana hai aur bas
logon ko raste ki zarurat hai aur mujhe
ik sang-e-rahguzar ko hatana hai aur bas
masrufiyat ziyada nahin hai miri yahan
mitti se ik charagh banana hai aur bas
soe hue to jaag hi jaenge ek din
jo jagte hain un ko jagana hai aur bas
tum vo nahin ho jin se vafa ki ummid hai
tum se miri murad zamana hai aur bas
phulon ko dhundta hua phirta huun baagh men
bad-e-saba ko kaam dilana hai aur bas
aab o hava to yuun bhi mira masala nahin
mujh ko to ik darakht lagana hai aur bas
nindon ka rat-jagon se ulajhna yunhi nahin
ik khvab-e-raegan ko bachana hai aur bas
ik vaada jo kiya hi nahin hai abhi ‘salim’
mujh ko vahi to vaada nibhana hai aur bas
Leave a Reply