Sheikh Ibrahim Zauq
mire siine se tera tiir jab ai jang-ju nikla
dahan-e-zakhm se khuun ho ke harf-e-arzu nikla
mira ghar teri manzil-gah ho aise kahan taale
khuda jaane kidhar ka chand aaj ai mah-ru nikla
phira gar asman to shauq men tere hai sargardan
agar khurshid nikla tera garm-e-justuju nikla
mai-e-ishrat talab karte the nahaq asman se ham
vo tha labrez-e-gham is khum-kade se jo subu nikla
tire aate hi aate kaam akhir ho gaya mera
rahi hasrat ki dam mera na tere ru-ba-ru nikla
kahin tujh ko na paaya garche ham ne ik jahan dhunda
phir akhir dil hi men dekha baghal hi men se tu nikla
khajil apne gunahon se huun main yaan tak ki jab roya
to jo aansu miri ankhon se nikla surkh-ru nikla
ghise sab nakhun-e-tadbir aur tuuti sar-e-sozan
magar tha dil men jo kanta na hargiz vo kabhu nikla
use ayyar paaya yaar samjhe ‘zauq’ ham jis ko
jise yaan dost apna ham ne jaana vo udu nikla
Leave a Reply