Mere Hath

Fahmida Riaz

dil men kab se rim-jhim karti

kaisi barkha baras rahi hai

is barkha ke amrit ras se

bhiig chuki main bhiig chuki main

lagti chhupti dhuup aur badal

ye akash ke nanhe balak

khel rahe hain hanste hanste

kilkari bharte sabze ko

shokh havaen chhed rahi hain

main bhi apne pankh jhatak kar

par taulun aur bharun udanen

apne badan men khud kho jaun

ye tan ka akash ye dharti

dhire dhire phail rahi hai

aur mere hathon ke pakheru

ye chanchal bechain parinde

ek anokhe raaz se be-kal

dharti men kuchh dhund rahe hain

dhund rahe hain aise pal ko

jis ki khoj men dil rahta hai

jis pal dharti mile gagan se

vo pal mere tan ke bahar

kahin nahin hai kahin nahin hai

ye panchhi ye narm pakheru

janmon se dharti ke sangi

is kaaya ke taal kinare

dhire dhire dhund rahe hain

khoe hue pal ki kankariyan