Farah Iqbal
mire ham-raqs saae ko bil-akhir yunhi dhalna tha
koi mausam nahin rukta so mausam ko badalna tha
taqaza maslahat ka tha hava se dosti kar len
charaghon ko ujale tak yunhi har taur jalna tha
use to ye ijazat thi vo jab chahe palat jaae
safar mera to baaqi tha mujhe to yunhi chalna tha
talatum men baha kar jo miri hasti ko le jaati
usi mauj-e-tamanna se mujhe pahle sambhalna tha
hamen bhi sabz rangat ka vo pairahan ata hota
hamari astinon men agar sanpon ko palna tha
hamesha apne kaase men duaon ki talab rakkhi
duaon ke vasile se bura har vaqt talna tha
bataya tha ki ye jauhar bahut nayab hai janan
use kho kar tumhen yunhi faqat hathon ko malna tha
shab-e-gham ki tavalat se na ghabrana ‘farah’ akhir
ye suraj dhal bhi jaae to ise phir se nikalna tha
Leave a Reply