Allama Iqbal
mata-e-be-baha hai dard-o-soz-e-arzumandi
maqam-e-bandagi de kar na luun shan-e-khudavandi
tire azad bandon ki na ye duniya na vo duniya
yahan marne ki pabandi vahan jiine ki pabandi
hijab iksir hai avara-e-ku-e-mohabbat ko
miri atish ko bhadkati hai teri der-paivandi
guzar-auqat kar leta hai ye koh o bayaban men
ki shahin ke liye zillat hai kar-e-ashiyan-bandi
ye faizan-e-nazar tha ya ki maktab ki karamat thi
sikhae kis ne ismail ko adab-e-farzandi
ziyarat-gah-e-ahl-e-azm-o-himmat hai lahad meri
ki khak-e-rah ko main ne bataya raz-e-alvandi
miri mashshatgi ki kya zarurat husn-e-maani ko
ki fitrat khud-ba-khud karti hai laale ki hina-bandi
Leave a Reply