Mariz-E-Hijr Ko Sehat Se Ab To Kaam Nahin

Poet

mariz-e-hijr ko sehat se ab to kaam nahin

agarche subh ko ye bach gaya to shaam nahin

rakho ya na rakho marham us pe ham samjhe

hamare zakhm-e-judai ko iltiyam nahin

jigar kahin hai kahin dil kahin hain hosh o havas

faqat judai men is ghar ka intizam nahin

koi to vahshi hai kahta koi hai divana

buton ke ishq men apna kuchh ek naam nahin

sahar jahan hui phir shaam vaan nahin hoti

basan-e-umr-e-ravan apna ik maqam nahin

kiya jo vada-e-shab us ne din pahad hua

ye dekhiyo miri shamat ki hoti shaam nahin

vahi uthae mujhe jis ne mujh ko qatl kiya

ki behtar is se mire khuun ka intiqam nahin

uthaya dagh-e-gul afsos tum ne dil pe ‘surur’

main tum se kahta tha gulshan ko kuchh qayam nahin