Main Kab Se Apni Talash Mein Hun Mila Nahin Hun

Pirzada Qasim

main kab se apni talash men huun mila nahin huun

saval ye hai ki main kahin huun bhi ya nahin huun

ye mere hone se aur na hone se munkashif hai

ki razm-e-hasti men kya huun main aur kya nahin huun

main shab nizhadon men subh-e-farda ki aarzu huun

main apne imkan men raushni huun saba nahin huun

gulab ki tarah ishq mera mahak raha hai

magar abhi us ki kisht-e-dil men khila nahin huun

na jaane kitne khudaon ke darmiyan huun lekin

abhi main apne hi haal men huun khuda nahin huun

kabhi to iqbal-mand hogi miri mohabbat

nahin hai imkan koi magar manta nahin huun

havaon ki dastaras men kab huun jo bujh rahunga

main istiara huun raushni ka diya nahin huun

main apni hi aarzu ki chashm-e-malal men huun

khula hai dar khvab ka magar dekhta nahin huun

udhar tasalsul se shab ki yalghar hai idhar main

bujha nahin huun bujha nahin huun bujha nahin huun

bahut zaruri hai ahd-e-nau ko javab dena

so tikhe lahje men bolta huun khafa nahin huun