Mirza Raza Barq
main agar rone lagun rutba-e-vala badh jaae
paani dene se nihal-e-qad-e-bala badh jaae
josh-e-vahshat yahi kahta hai nihayat kam hai
do jahan se bhi agar vusat-e-sahra badh jaae
qumriyan dekh ke gulzar men dhoka khaen
tauq minnat ka jo ai sarv-e-tamanna badh jaae
haath par haath agar maar ke daudun baham
rah-e-ulfat men qadam qais se mera badh jaae
daagh par daagh se ai ‘barq’ mujhe rahat hai
dard kam ho to shab-e-hijr men iiza badh jaae
Leave a Reply