Poet
mahv huun main jo us sitamgar ka
hai gila apne hal-e-abtar ka
haal likhta huun jan-e-muztar ka
rag-e-bismil hai taar mistar ka
aankh phirne se teri mujh ko hua
gardish-e-dahr daur saghar ka
shola-ru yaar shola-rang sharab
kaam yaan kya hai daman-e-tar ka
shauq ko aaj be-qarari hai
aur vaada hai roz-e-mahshar ka
naqsh-e-taskhir-e-ghair ko us ne
khuun liya to mire kabutar ka
meri nakami se falak ko husul
kaam hai ye usi sitamgar ka
us ne ashiq likha adu ko laqab
haae likkha mire muqaddar ka
aap se lahza lahza jaate ho
‘shefta’ hai khayal kis ghar ka
Leave a Reply