Poet
maddah huun main dil se mohammad ki aal ka
mushtaq huun vasi-e-nabi ke jamal ka
khvahan guhar ka huun na main talib huun laal ka
mushtaq huun tumhare dahan ke ugaal ka
dekho to ek ja pe thaharti nahin nazar
lapka pada hai aankh ko kya dekh-bhal ka
kya un se faiz pahunche jo khud tira-bakht hain
khilte na dekha ham ne kabhi phuul dhaal ka
ham hain faqir daulat-e-duniya se kaam kya
behtar hai jam-e-jam se piyala sifal ka
daana dikha ke daam men anqa ko launga
mazmun likh raha huun tire khat-o-khal ka
sau jaan se fida huun mohammad ke naam par
jis ne bataya farq haram o halal ka
vo aankh bhi utha ke hamen dekhte nahin
rutba pahunch gaya hai ye ranj-o-malal ka
kis zindagi ke vaste daulat ki aarzu
dekho natija ghaur se qarun ke maal ka
iqbal gar nahin hai tu inkar kijiye
kuchh dijiye javab hamare saval ka
mutthi ko khol kar yad-e-baiza dikhate hain
nakhun pe un ke hota hai dhoka hilal ka
shaer ghazab ke hote hain hargiz na chukte
mauqaa nahin dahan men tire qil-o-qal ka
ai rashk-e-mehr vasl men ghussa hai kis liye
ye vaqt meri jaan nahin hai jalal ka
tariki-e-lahad se kuchh ‘agha’ na khauf kar
daman hai tere haath men zahra ke laal ka
Leave a Reply