Qateel Shifai
raushni duub gai chand ne munh dhanp liya
ab koi raah dikhai nahin deti mujh ko
mere ehsas men kohram macha hai lekin
koi avaz sunai nahin deti mujh ko
raat ke haath ne kirnon ka gala ghunt diya
jaise ho jaae zamin-bos shivala koi
ye ghata-top andhera ye ghana sannata
ab koi giit hai baaqi na ujala koi
jis ne chhup-chhup ke jalaya miri ummidon ko
vo sulagti hui thandak mire ghar tak pahunchi
dekhte dekhte sailab-e-havas phail gaya
mauj-e-payab ubhar kar mire sar tak pahunchi
mire tarik gharaunde ko udasi de kar
muskurate hain darichon men ishare kya kya
uf ye ummid ka madfan ye mohabbat ka mazar
is men dekhe hain tabahi ke nazare kya kya
jis ne aankhon men sitare se kabhi ghole the
aaj ehsas pe kajal sa bikhera us ne
jis ne khud aa ke tatola tha mire siine ko
le liya ghair ke pahlu men basera us ne
vo talavvun ki nahin jis ka thikana koi
us ke andaz-e-kuhan aaj nae taur ke hain
vahi bebak ishare vahi bhadke hue giit
kal mire haath bike aaj kisi aur ke hain
vo mahakta sa chahakta sa ubalta siina
us ki miad hai do roz lipatne ke liye
zulf bikhri hui bikhri to nahin rah sakti
phailta hai koi saaya to simatne ke liye
Leave a Reply