Lucknow

Asrarul Haq Majaz

firdaus-e-husn-o-ishq hai daman-e-lucknow

ankhon men bas rahe hain ghazalan-e-lucknow

sabr-azma hai ghamza-e-turkan-e-lucknow

rashk-e-zanan-e-misr kanizan-e-lucknow

har samt ik hujum-e-nigaran-e-lucknow

aur main ki ek shokh-ghazal-khvan-e-lucknow

mutrib bhi hai sharab bhi abr-e-bahar bhi

shiraz ban gaya hai shabistan-e-lucknow

tole hue hai tegh-o-sinan husn-e-be-naqab

navak-fagan hai jalva-e-pinhan-e-lucknow

ik nau-bahar-e-naz ko taake hai phir nigah

vo nau-bahar-e-naz ki hai jan-e-lucknow

dast-e-junun ko rokiye ye khabt chhodiye

rusva hai yunhi chak-e-gareban-e-lucknow

kuchh roz ka musafir-o-mehman huun aur kya

kyuun bad-guman hon yusuf-e-kanan-e-lucknow

ab us ke baad subh hai aur subh-e-nau ‘majaz’

ham par hai khatm sham-e-ghariban-e-lucknow