Aal E Ahmad Suroor
lo andheron ne bhi andaz ujalon ke liye
kaisi uftad padi dekhne valon ke liye
taza-kari ne vahan kar diye aalam ijad
ham taraste hi rahe taaza khayalon ke liye
shah-rahon se guzarte hain shab-o-roz hujum
nai rahen hain faqat chand jiyalon ke liye
kaam maazi ki ye sada-nigahi kya aati
asr-e-hazir tire pechida savalon ke liye
kitni shamen bujhin nadida kiran ki khatir
kitne suraj liye mauhum ujalon ke liye
kitne sangin haqaeq se nichoda hai lahu
chand khvabon ke liye chand khayalon ke liye
go nigah-dari-e-adab-e-junun mushkil hai
phir bhi asan hai tire chahne valon ke liye
Leave a Reply