Mirza Raza Barq
laakh parde se rukh-e-anvar ayaan ho jaega
parda khul jaega har parda katan ho jaega
jauhar-e-tegh-e-isalat sab ayaan ho jaega
imtihan ke vaqt apna imtihan ho jaega
tu agar ai maah aa nikla kisi din bad-e-marg
parda-e-khak-e-mazar apna katan ho jaega
pech zulfon ke jo khul jaenge ru-e-yar par
sumbul-e-tar atish-e-gul ka dhuan ho jaega
tu vo gul-ru hai ki tujh ko dekh kar niklegi jaan
bulbul-e-ruh o ravan be-ashiyan ho jaega
ru-e-rangin ki hikayat nazm agar karne lagen
‘barq’ sab divan hamara bostan ho jaega
Leave a Reply