Poet
kya masarrat hai puchhiye ham se
hai ibarat har ik khushi gham se
araq-alud aap ka chehra
ho dhula phuul jaise shabnam se
zabt-e-girya se raz-e-gham tha chhupa
khul gaya aaj chashm-e-pur-nam se
dard-e-dil ka nahin koi darman
zakhm kya mundamil ho marham se
dar-haqiqat qarib rahte hain
vo ba-zahir hi duur hain ham se
jab azal se khata zamir men hai
kyuun khata ho na ibn-e-adam se
Leave a Reply