Allama Iqbal
kushada dast-e-karam jab vo be-niyaz kare
niyaz-mand na kyuun ajizi pe naaz kare
bitha ke arsh pe rakkha hai tu ne ai vaaiz
khuda vo kya hai jo bandon se ehtiraz kare
miri nigah men vo rind hi nahin saaqi
jo hoshiyari o masti men imtiyaz kare
mudam gosh-ba-dil rah ye saaz hai aisa
jo ho shikasta to paida nava-e-raz kare
koi ye puchhe ki vaaiz ka kya bigadta hai
jo be-amal pe bhi rahmat vo be-niyaz kare
sukhan men soz ilahi kahan se aata hai
ye chiiz vo hai ki patthar ko bhi gudaz kare
tamiz-e-lala-o-gul se hai nala-e-bulbul
jahan men va na koi chashm-e-imtiyaz kare
ghurur-e-zohd ne sikhla diya hai vaaiz ko
ki bandagan-e-khuda par zaban daraz kare
hava ho aisi ki hindostan se ai ‘iqbal’
uda ke mujh ko ghubar-e-rah-e-hijaz kare
Leave a Reply