Haidar Ali Aatish
kucha-e-dilbar men main bulbul chaman men mast hai
har koi yaan apne apne pairahan men mast hai
nashsha-e-daulat se munim pairahan men mast hai
mard-e-muflis halat-e-ranj-o-mehan men mast hai
daur-e-gardun hai khudavanda ki ye daur-e-sharab
dekhta huun jis ko main us anjuman men mast hai
aaj tak dekha nahin in ankhon ne ru-e-khumar
kaun mujh sa gumbad-e-charkh-e-kuhan men mast hai
gardish-e-chashm-e-ghazalan gardish-e-saghar hai yaan
khush rahen ahl-e-vatan divana-pan men mast hai
hai jo hairan-e-safae-rukh halab men aina
bu-e-zulf-e-yar se aahu khutan men mast hai
ghafil o hoshyar hain us chashm-e-mai-gun ke kharab
zinda zer-e-pairahan murda kafan men mast hai
ek saghar do jahan ke gham ko karna hai ghalat
ai khusha-tale jo shaikh-o-barhaman men mast hai
vahshat-e-majnun-o-‘atish’ men hai bas itna hi farq
koi ban men mast hai koi vatan men mast hai
Leave a Reply