Kis Se Puchhun Hae Main Is dil Ke Samjhane Ki Tarah

Poet

kis se puchhun haae main is dil ke samjhane ki tarah

saath tiflan ke laga phirta hai divane ki tarah

yaar ke paanv pe sar rakh ji ko apne dijiye

is se behtar aur nahin hoti hai mar jaane ki tarah

kab pilavega tu ai saaqi mujhe jam-e-sharab

jan-ba-lab huun aarzu men mai ki paimane ki tarah

mast aata hai piye mai aaj vo qatil mira

kuchh nazar aati hai mujh ko apne ji jaane ki tarah

shama-ru ke gird phirti hain sada qurban ho

chashm meri par laga mizhgan ke parvane ki tarah

baagh men gul ne kiya apne taiin lohuluhan

dekh us ghuncha-dahan ke paan ke khane ki tarah

fasl-e-gul aai hai ‘taban’ ghar men kya baitha hai yuun

kar gareban chaak ja sahra men divane ki tarah