Allama Iqbal
khudi ho ilm se mohkam to ghairat-e-jibril
agar ho ishq se mohkam to sur-e-israfil
azab-e-danish-e-hazir se ba-khabar huun main
ki main is aag men daala gaya huun misl-e-khalil
fareb-khurda-e-manzil hai karvan varna
ziyada rahat-e-manzil se hai nashat-e-rahil
nazar nahin to mire halqa-e-sukhan men na baith
ki nukta-ha-e-khudi hain misal-e-tegh-e-asil
mujhe vo dars-e-farng aaj yaad aate hain
kahan huzur ki lazzat kahan hijab-e-dalil
andheri shab hai juda apne qafile se hai tu
tire liye hai mira shola-e-nava qindil
gharib o saada o rangin hai dastan-e-haram
nihayat is ki husain ibtida hai ismail
Leave a Reply