Syeda Nafis Bano Shama
khud se lipat ke ro len bahut muskura liye
khushiyon se aaj dard ke pahlu nikaliye
us ne tiri nigah se kya raaz pa liye
khud apne dil men us ne thikane bana liye
daman men to gire the kai phuul bhi magar
palkon se chun ke ham ne tire gham utha liye
ab tum na kah sakoge ki ham surkh-ru nahin
apne lahu men aaj to ham bhi naha liye
mehr-o-vafa khulus-e-tamanna milan ki aas
kuchh kam nahin ki ham ne ye moti bacha liye
daava tha jin ko apni masihai par bahut
ai ‘shama’ un ke ham ne karam aazma liye
Leave a Reply