Shah Naseer
khandan-e-qais ka main to sada se piir huun
silsila-jumban-e-shor-e-khana-e-zanjir huun
khaksari ke abhi to darpai tadbir huun
kushta ho kar khaak jab hon tab kabhi iksir huun
zoaf ne go kar diya hai juun kaman gosha-nashin
ab bhi chalne ko jo puchho to sarasar tiir huun
rishta-e-ulfat ne bandhe hain par-e-parvaz aah
dam-e-hairat men ba-rang-e-bulbul-e-tasvir huun
tujh se ye uqda khulega ai nasim-e-subh-dam
ghunche ki manind is gulshan men kyuun dil-gir huun
muntazir chashm-e-rikab ai said-e-afgan hai hanuz
bosa-e-fitrak ki khvahish hai vo nakhchir huun
faqr ki daulat ke aage saltanat kya maal hai
bistare par apne ai ruba-mizajo sher huun
sach hai apne dam se qaaem hai ye buniyad-e-jahan
raunaq-afza-e-chaman araish-e-taamir huun
jaisi chahe vaisi le mujh se qasam qatil na dar
hashr ko bhi gar kabhi tera main daman-gir huun
ahl-e-jauhar hi mire mazmun ko samjhe hai ‘nasir’
main bhi iqlim-e-sukhan men sahib-e-shamshir huun
Leave a Reply