Ahmad Husain Mail
khade hain muusa uthao parda dikhao tum ab-o-tab-e-ariz
hijab kyuun hai ki khud tajalli bani hui hai hijab-e-ariz
na ruk sakegi ziya-e-ariz jo sadd-e-rah ho naqab-e-ariz
vo hogi be-parda rakh ke parda ghazab ki chanchal hai tab-e-ariz
chhupa na munh donon haath se yuun tadapti hai barq-e-tab-e-ariz
laga na de aag ungliyon men ye garmi-e-iztirab-e-ariz
jo un ko lipta ke gaal chuma haya se aane laga pasina
hui hai boson ki garm bhatti khinche na kyuun kar sharab-e-ariz
pari jo dekhe kahe tadap kar jo huur dekhe kahe phadak kar
tumhara gesu javab-e-gesu tumhara aariz javab-e-ariz
huzur ghunghat utha ke aaen badi chamak kis men hai dikhaen
idhar rahe aftab-e-mahshar udhar rahe aftab-e-ariz
chhupana kya ek ka tha manzur aaj tak hain jo chaar mashhur
zabur tauret mushaf injil panchvin hai kitab-e-ariz
na kyuun ho daava barabari ka vahan mila til yahan suvaida
ye nuqta-e-intikhab-e-ariz hai vo nuqta-e-intikhab-e-ariz
pada huun ghash men mujhe sungha do pasina chehre ka zulf ki bu
nahin hai kam lakhlakhe se mujh ko ye mushk-e-gesu gulab-e-ariz
jo shoala-ru munh chhupa ke nikla dhuan sar-e-rah kuchh kuchh uttha
lagi vo atish bane hai jal kar naqab-e-ariz kabab-e-ariz
na jhepo subh-e-visal dekho tum aankh se aankh to milao
liye hain gin gin ke main ne bose zaban par hai hisab-e-ariz
karo na ghusse se laal chehra bhavon men daalo na bal khudara
nahin majal-e-jalal-e-abru nahin hai tab-e-itab-e-ariz
jo gaal par gaal ham rakhenge shab-e-visal un ke haath uthenge
tamanche marenge pyaar se vo bajengge chang-o-rubab-e-ariz
kamar ko gardan ko dast-o-lab ko visal men lutf de raha hai
shabab-e-zanu shabab-e-bazu shabab-e-sina shabab-e-ariz
janab-e-‘mail’ ye kudak-e-dil buton ki ulfat men hoga kamil
padhao quran ke badle is ko bayaz-e-gardan kitab-e-ariz
Leave a Reply