Poet
kaun yaan bazar-e-khubi men tira ham-sang hai
husn ke mizan men tere mahr-o-mah pasang hai
main vo huun divana-e-sarkhil-e-arbab-e-junun
haath men patthar liye har tifl mere sang hai
ja-e-takiya ashiq-e-be-khanuman ko vaqt-e-khvab
zer-e-sar kuche men tere khisht hai pasang hai
is javahar-posh ke dekhe hain vo yaqut-e-lab
jis ki rangini ke aage laal bhi ik sang hai
surmai ankhon ka tere jo koi bimar ho
ek miil us ke taiin rakhna qadam farsang hai
jal gaya tanha na koh-e-tur hi parvana-var
aag tere ishq ki sham-e-dil-e-har-sang hai
sakht-jani meri aur zalim tire sangin-dili
aah misl-e-asiya ye sang uupar sang hai
baap ka hai fakhr vo beta ki rakhta ho kamal
dekh aine ko farzand-e-rashid-e-sang hai
sar mira tere qadam ke saath yuun hai pesh-rau
thokaron men jis tarah se rah-guzar ka sang hai
e’tiqad-e-momin-o-kafir hai rahbar varna phir
kuchh nahin dair-o-haram men khaak hai pasang hai
ye sada ghar ghar kare hai asiya phir phir mudam
musht-e-gandum ke liye chhani ke upar sang hai
shaikh ki masjid se ai ‘bedar’ kya hai tujh ko kaam
sajda-gah apna sanam ke astan ka sang hai
Leave a Reply