Sufi
karen ah-o-fughan phoden-phaphole is tarah dil ke
irada hai ki roen iid ke din bhi gale mil ke
tamashe dekhte hain aj-kal vo raqs-e-bismil ke
sune ham ne bhi ghairon se ye qisse un ki mahfil ke
kahani men tasalsul hai na mauzun hai koi qissa
fasane bhi pareshan hain hamare muztarib dil ke
karen kya ghair se takrar vo na-ahl-o-nadan hai
jo aaqil hain va munh lagte nahin be-maghz-o-jahil ke
jagah rone ki hai mad.hosh pa kar bagh-e-alam men
meri ghaflat pe ye ghunche bhi ab hanste hain khil khil ke
pareshan kyuun na ho dukhta hua dil sair-e-gulshan se
ki ahl-e-dard sun sakte nahin naale anadil ke
ye bola dekh kar aina mujh se vo mera khud-bin
kaho khush-ru jahan men aur hain mere muqabil ke
bulaya pahle maqtal men kiya hai zab.h khud mujh ko
qayamat tak na bhulunga ye ehsan apne qatil ke
tujhe mushkil-kusha samjhun na kyuun kar ai mere ‘varis’
tere hathon se hal hote hain uqde meri mushkil ke
gham-o-ranj-o-alam ka samna ‘aughat’ na kyuun kar ho
ki rah-e-ishq men ye marhale hain pahli manzil ke
Leave a Reply