Poet
kali jo gul ki chatak rahi hai tabiat apni khatak rahi hai
jahan men vahshat bhatak rahi hai hazar sar ko patak rahi hai
chaman men hai jo ki shakh-e-sumbul urus-e-gul ki vo ya hai kakul
tujhe khabar hai kuchh us ki bulbul jo us ke munh par latak rahi hai
vahan mujhe shauq-e-dil tu le ja jahan na saghar na hoe miina
ba-rang-e-saqi har ek baitha sharab-e-khalis tapak rahi hai
chaman men bulbul yahi pukari lo mai-kashon ki phir aai baari
zaban pe shishe ke hai ye jaari sharab lo yaan dhalak rahi hai
kahin pe majmaa hai mai-kashon ka kahin akhada hai un buton ka
kahin barasna hai badalon ka kahin pe bijli chamak rahi hai
mizha ki ulfat men zaar ban kar raha huun mu-e-nigar ban kar
ye saans siine men khaar ban kar jigar ke andar khatak rahi hai
na us men aai zara kudurat gulon ki maili na siyahat
saba chaman men pae latafat gulon ke jaame chhitak rahi hai
nahin bagula miyan-e-hamun jo mujh se puchho to saaf kah duun
talash-e-laila men ruh-e-majnun har ek janib bhatak rahi hai
ghurur-e-husn ai nigar kab tak chaman ke uupar bahar kab tak
rahoge zeb-e-kanar kab tak khizan har ik gul ko tak rahi hai
jahan na bhatti na mai-kada hai ajab tarah ka magar saman hai
khum-e-falak men ye kya bhara hai sharab-e-safi tapak rahi hai
kahun main fiqara vo hai hansi ka charagh-e-mahfil ka hai falita
chhuta jo shamla hai shaikh ji ka ye un ki shekhi latak rahi hai
bahar laaya hai saghar-e-gul bhare hain goya piyala-e-mul
nahin hai mahfil men shor-e-qulqul chaman men bulbul chahak rahi hai
ladai kis ne hai aankh uupar nigah us ki hai misl-e-khanjar
main dekhta huun ki chashm-e-akhtar falak ke uupar jhapak rahi hai
hamare dil men nahin hai kiina ki jaise be-jurm ho nagina
ye bahr-e-hasti ka hai safina isi pe duniya phadak rahi hai
bahar hai daur-e-mai-kashi ki gulon ki rangat abhi hai phiki
ajiib halat hai ‘muntahi’ ki abhi se chhati dhadak rahi hai
Leave a Reply