Bushra Saeed
kandhe par qad se lambi bori latkae
ek bachcha
kachre ke us dher ki janib lapakta hai
jahan se
naak band kar ke guzarna bhi dushvar lagta hai
shaam tak
ghalazat ke us pahad se
vo badbu-dar
dabbe botalen aur bosida kaghaz chunega
din dhale
apni khvari ki
sasti mazduri jab paega
ghar jaate hue vo
khushi ka raag gaega
magar
us ki niili shaffaf ankhon ka
siyah khvab
taaza kachre ka dher
koi nahin sochega
us ki dudhiya jild ki tah men
utarti zahrili mail
koi nahin dhoega
vo maasum bachcha
kya hamen
kabhi nazar nahin aaega
Leave a Reply