Poet
kabhi qalam kabhi nezon pe sar uchhalte hain
ab is fasil se suraj kahan nikalte hain
gharon se be-sabab apne kahan nikalte hain
zaruraton ke isharon pe log chalte hain
andhera un ke gharon ka bahut bhayanak hai
tamam shahr men jin ke charagh jalte hain
hava ke jhonke hain tere payambar lekin
hava ke jhonke hi chehron pe khaak malte hain
badal bhi jaae agar vo to ham na badlenge
nazar ke saath nazare kahan badalte hain
vahan ke sar-phire dariyaon ka khuda-hafiz
pahad aag bahut kam jahan ugalte hain
usi ke naghmon se jhumegi kaenat ai ‘yad’
vo jis ke samne ahan-sifat pighalte hain
Leave a Reply