Kishwar Naheed
kabhi bhulaya nahin yaad bhi kiya nahin hai
ye kaisa jurm hai jis men koi saza nahin hai
main baat baat pe rone ka majra puchhun
vo hans raha hai batane ko kuchh raha nahin hai
zamin pe ah-o-buka aur khun-e-nahaq bhi
zaban-e-khalq ye puchhe hai kya khuda nahin hai
kalam karne ko naseh raha na vaaiz hai
main kya kahun ki mire paas bad-dua nahin hai
bas ab to aankh men sahra hi jam gaya aa ke
samajh lo khvab bhi dahliz pe rakha nahin hai
qadam qadam pe vahi tilmilati khvahish hai
payam laane ko koi bhi dilruba nahin hai
miri udasi mire kaam aa saki na kabhi
bas ab saval bhi karne ka hausla nahin hai
raqib-e-khvahish-e-maujuda sun liya tu ne
chaman bahut hain magar koi dekhta nahin hai
Leave a Reply