Poet
kab is zamin pe mujhe armida hona tha
hava se khaak ko barson parida hona tha
agar thi daman-e-janan ki aarzu ai dil
to chand dam ke liye ab-dida hona tha
kisi ke chehre pe hota kisi ke daman men
mujhe bhi aankh ka ashk-e-chakida hona tha
kabhi na khidmat-e-daman se sarfaraz hua
vo haath huun ki jise na-rasida hona tha
kamal-e-be-adabi se ye arz karte hain
hamin se a qad-e-janan kashida hona tha
agar thi lazzat-e-pamal ki havas ai dil
ba-shakl-e-sabza zamin par damida hona tha
ajab na tha ki use rahm kuchh na kuchh aata
meri umiid tujhe abr-dida hona tha
kamal-e-rabt men hoti hain saikadon baten
na is qadar tumhen ham se kashida hona tha
tira jamal bana main kabhi, kabhi ehsan
gharaz ye thi ki mujhe barguzida hona tha
khuli ab aankh to kya faeda ‘nasim’ afsos
na samjhe zer-e-lahad armida hona tha
Leave a Reply