Shah Naseer
jo guzre hai bar ashiq-e-kamil nahin maalum
jibril hai har aan men nazil nahin maalum
kya parda-e-ghaflat hai kuchh ai dil nahin maalum
rahta hai shab-o-roz vo nazil nahin maalum
har dam yahi rahta hai yahan dil men pas-o-pesh
jiine ka ba-juz-marg kuchh hasil nahin maalum
rukh dekh ke hairan huun tira juun gul-e-khurshid
chhut tere mujhe koi muqabil nahin maalum
bakhshish ye jo rakhta hai ba-kaf bahr hai kashti
kya janiye ye kis se hai saail nahin maalum
be-thah ho kya bahr-e-haqiqat ka shanavar
jis ka kahin akhir lab-e-sahil nahin maalum
kyuun rahte hain nit revdi ke phere men ashiq
us ke lab-e-shirin pe kahin til nahin maalum
jarrah ye kahta hai mujhe dekh ke be-dam
kis tegh-e-nigah ka hai ye ghael nahin maalum
juun aina hairat-zada yaan dekhun huun sab ko
kya janiye kis par huun main maail nahin maalum
chal chal ke rah-e-ishq men juun naqsh-e-qadam ham
thak baithe ‘nasir’ ab hamen manzil nahin maalum
Leave a Reply