Yasmeen Habeeb
jo chala gaya so chala gaya jo hai paas us ka khayal rakh
jo luta diya use bhuul ja jo bacha hai us ko sambhal rakh
kabhi sar men sauda sama koi kabhi regzar men raqs kar
kabhi zakhm bandh ke paanv men kahin surkh surkh dhamal rakh
jo churai hai shab-e-tar se kai ratjagon ko guzar ke
vahi kajalon ki lakir hai apni aankh men daal daal rakh
kisi taara taara firaq se koi guftugu koi baat kar
ye javab-gah-e-shuur hai koi apne paas saval rakh
tire dard saare giran-baha tiri vahshaten hain azim-tar
vahi baal khol ke bain kar vahi sham-e-sahn-e-malal rakh
jahan laghzishon se mafar nahin ye vo agahi ka maqam hai
yahan hast-o-bud ko bhuul ja nai qurbaton se visal rakh
ye jo raushni ka hai daera ye rahin-e-shams-o-qamar nahin
tire bas men kab tha ki ab rahe tu uruuj rakh ya zaval rakh
Leave a Reply