Ambareen Haseeb Ambar
jism-o-jan men dar aai is qadar aziyyat kyuun
zindagi bhala tujh se ho rahi hai vahshat kyuun
silsila mohabbat ka sirf khvab hi rahta
apne darmiyan akhir aa gai haqiqat kyuun
faisla bichhadne ka kar liya hai jab tum ne
phir miri tamanna kya phir miri ijazat kyuun
ye ajiib uljhan hai kis se puchhne jaaen
aaine men rahti hai sirf ek surat kyuun
karr-o-farr se nikle the jo sametne duniya
bhar ke apne daman men aa gae nadamat kyuun
aap se mukhatib huun aap hi ke lahje men
phir ye barhami kaisi aur ye shikayat kyuun
Leave a Reply