Meer Hasan
jis shakhs ki ho ziist faqat naam se tere
us shakhs ka kya haal ho paigham se tere
gaali hai ki hai sehr koi ya ki hai afsun
ji shaad hua jaata hai dushnam se tere
hai apni khushi is men ki to jis men khushi ho
aram hai apne taiin aram se tere
ahista qadam rakhiyo tu ai naqa-e-laila
majnun ka bandha aata hai dil gaam se tere
jab kuche men ja baithte hain tere to apni
ankhen lagi rahti hain dar-o-bam se tere
hai apne hamen kaam se kaam ai but-e-khud-kam
ham kaam nahin rakhte hain kuchh kaam se tere
kya hijr ki raat aai ki manind-e-charaghan
phir jalne lage daagh ‘hasan’ shaam se tere
Leave a Reply