Jahan Mere Na Hone Ka Nishan Phaila Hua Hai

Zafar Iqbal

jahan mere na hone ka nishan phaila hua hai

samajhta huun ghubar-e-asman phaila hua hai

main is ko dekhne aur bhuul jaane men magan huun

mire aage jo ye khvab-e-ravan phaila hua hai

inhi do hairaton ke darmiyan maujud huun main

sar-e-ab-e-yaqin aks-e-guman phaila hua hai

rihai ki koi surat nikalni chahiye ab

zamin sahmi hui hai aur dhuan phaila hua hai

koi andaza kar sakta hai kya is ka ki akhir

kahan tak saya-e-ahd-e-ziyan phaila hua hai

kahan duube kidhar ubhre badan ki naav dekhen

ki itni duur tak dariya-e-jan phaila hua hai

main dil se bhaag kar ja bhi kahan sakta huun akhir

mire har su ye dasht-e-be-aman phaila hua hai

mujhe kuchh bhi nahin malum aur andar hi andar

lahu men ek dast-e-raegan phaila hua hai

‘zafar’ ab ke sukhan ki sarzamin par hai ye mausam

bayan ghaeb hai aur rang-e-bayan phaila hua hai