Bashar Nawaz
jab chhai ghata lahrai dhanak ik husn-e-mukammal yaad aaya
un hathon ki mehndi yaad aai un ankhon ka kajal yaad aaya
sau tarah se khud ko bahla kar ham jis ko bhulae baithe the
kal raat achanak jaane kyuun vo ham ko musalsal yaad aaya
tanhai ke saae bazm men bhi pahlu se juda jab ho na sake
jo umr kisi ke saath kati us umr ka pal pal yaad aaya
jo ziist ke tapte sahra par bhule se kabhi barsa bhi nahin
har mod pe har ik manzil par phir kyuun vahi badal yaad aaya
ham zud-faramoshi ke liye badnam bahut hain phir bhi ‘bashar’
jab jab bhi chali madmati pavan udta hua anchal yaad aaya
Leave a Reply