Sheikh Ibrahim Zauq
jab chala vo mujh ko bismil khuun men ghaltan chhod kar
kya hi pachhtata tha main qatil ka daman chhod kar
main vo majnun huun jo niklun kunj-e-zindan chhod kar
seb-e-jannat tak na khaun sang-e-tiflan chhod kar
piive mera hi lahu maani jo lab us shokh ke
khinche to shangarf se khun-e-shahidan chhod kar
main huun vo gumnam jab daftar men naam aaya mira
rah gaya bas munshi-e-qudart jagah vaan chhod kar
saya-e-sarv-e-chaman tujh bin darata hai mujhe
saanp sa paani men ai sarv-khiraman chhod kar
ho gaya tifli hi se dil men tarazu tir-e-ishq
bhage hain maktab se ham auraq-e-mizan chhod kar
ahl-e-jauhar ko vatan men rahne deta gar falak
laal kyuun is rang se aata badakhshan chhod kar
shauq hai us ko bhi tarz-e-nala-e-ushshaq se
dam-ba-dam chhede hai munh se dud-e-qulyan chhod kar
dil to lagte hi lage ga huryan-e-adn se
bagh-e-hasti se chala huun haae pariyan chhod kar
ghar se bhi vaqif nahin us ke ki jis ke vaste
baithe hain ghar-bar ham sab khana-viran chhod kar
vasl men gar hove mujh ko ruyat-e-mah-e-rajab
ru-e-janan hi ko dekhun main to quran chhod kar
in dinon garche dakan men hai badi qadr-e-sukhan
kaun jaae ‘zauq’ par dilli ki galiyan chhod kar
Leave a Reply